Biskit en die Boomhuis deur Hilde Hay

Biskit woon saam met sy kwaai tannie Ursula in die stad. Maar sy beste plek is by sy geliefde oupa in ‘n boomhuis langs die meer. Oupa se vreemde manier van leef dryf sy tannie tot raserny. Sy probeer Biskit keer om by Oupa te kom.

Asof dit nie erg genoeg is nie, is daar nog die vreesaanjaende voëlman wat dalk beplan om Biskit in die pot te gooi. Kan Biskit en sy maatjie, Ama, vir eens en vir altyd van tannie Ursula ontslae raak?

Meer oor die skrywer:

Hilde Hay is ‘n sielkundige wat navorsing, assessering, loopbaan- en ouerbegeleiding doen. Na meer as twee dekades in Johannesburg het sy en haar gesin die grote stad verruil vir ‘n klein kusdorpie in die tuinroete. Daar bied sy ‘retreats’ aan om vir mense die spasie te skep om tot stilstand te kom. 

Presies op die plek waar sy nou woon, was daar ‘n regte boomhuis, in ‘n regte peperboom, langs ‘n regte meer. Dit is waar Biskit se storie gebore is.